Mga eskuylahan sa Busay, Sapangdaku pangitaan og permanenteng kabalhinan

CEBU, Philippines - Duha ka eskuylahan sa bukirong barangay sa dakbayan sa Sugbo ang giplanohan nga permanente nang ibalhin sa mas luwas nga lugar tungod sa kapeligro sa gikahimutangan niini. Kahinumduman nga gideklara ni Mayor Michael Rama ang Busay Elementary School ug Sapangdaku Elementary School nga ubos sa “state of calamity” niadtong Hunyo 9 inubanan sa pagsugod sa ting-uwan. Ang BES misuspenso una sa ilang klase sugod niadtong Hunyo 13, ug anha sila karon nagklase sa Busay complex nga gipapaspasan og bahin-bahin aron himoan og siyam ka lawak aron ma-accommodate ang 500 ka mga estudyante.

Ang BES nahimutang sa “landslide prone area” hinungdan nga dili na kini luwas sa mga estudyante ug sa mga magtutudlo. Gitinguha nga mobalik ang klase sa sunod semana. Samtang ang SES nabutang usab sa agianan sa baha mibalik sa ilang klase niadtong Hunyo 11 apan diha kini gihimo sa Sapangdaku Barangay Hall. Matud ni Barangay Captain Lorna Damalerio, wala makasamok ang pagbalhin sa mga estudyante sa barangay hall.

Sa pag-inspeksyon ni Rama kagahapon sa buntag, mas maayong mopalit na lang ang siyudad og private-owned house and lot tungod kay naglisod sila og pangita og luna nga permanenting kabalhinan sa mga eskuylahan.

Matud niya nga angay kwestyunon ang nagpatukod sa maong mga eskuylahan sa maong mga lugar nga nahibawo na man unta nga agianan kini og baha. Kuyog sa pag-inspeksyon ni Rama ang local school board, Quick Response Team, ug duha ka pribadong contractors nga motabang sa pagtukod sa mga eskwelahan.  - /EIM (BANAT NEWS)