Kalambigitan sa aktibong polis sa drug syndicate sa Bohol gisubay

CEBU, Philippines - Ang Regional Intelligence Division nakakuha og listahan sa mga gidudahang mga aktibong polis nga nalambigit sa illegal drug syndicate sa lalawigan sa Bohol.

Duna karo’y nakuha nga dugang ebidensya ang Regional Intelligence Division (RID) nga nagtudlo kung kinsa ang mga kauban sa grupo sa kanhi polis nga si Owen Rosales nga napatay sa engkwentro sa Bien Unido kapin usa ka semana na ang milabay.

Si Superintendent Pablo Labra II, ang hepe sa RID nga nahinabi sa Banat News mibutyag s nga duna sila’y nakuha nga mga codes gikan sa mga notes sa mga suspek diha sa mga cottage sa resort diin nahitabo ang engkwentro. Apil sa gisubay karon kung tinood ba nga dunay mga aktibong polis ang naapil sa maong grupo gumikan sa mga codes nga ilang nakuha.

“Ato pa nga gi-validate ang atong nakuha nga mga codes, daghan ang nakabutang,” matud pa ni Labra. Dili pa sab mahatag sa opisyal ang kinatibuk-ang saysay kung unsa ang mga nakabutang sa mga codes apan gipasabot ni Labra nga usa ka maayong ebidensya alang sa pagtudlo kung kinsa pa ang apil sa sindikato sa maong lugar.

Gidugang pa ni Labra nga ila ‘sab nga gipaabot karon ug nagpadala na ‘sab sila og request letter sa crime laboratory nga ila nang makuha ang resulta sa ballistic examination sa mga nakuha nga basiyo sa armas sa ambush site sa Talibon diin gipatay si Chief Inspector George Caña ug sa mga basiyo nga nakuha sa Playa Beach diin nahitabo ang engkwentro kun magtakdo ba kini.  - /EIM (BANAT NEWS)