Lalaking gidakop dili diay tulisan

CEBU, Philippines - Lalaking gidakop sa kapolisan may labot sa nahitabong pagtulis sa 17 Twenty-one Travel Shop sa Saberon Compound sa dalan A.S. Fortuna sa Barangay Banilad, Dakbayan sa Mandaue sa miaging Lunes sa udto dili mao.

Matud pa ni SPO3 Marcos Noval Jr. sa Investigation Detection and Management Bureau (IDMB) sa Mandaue City Police Office (MCPO) wa matumbok sa mga kawani kung ang ilang nadakpan nga si Roy Agosto Malinao, 37, mao ba gyud ang tulisan.

Si Malinao, nga taga Barangay Bateria, Lungsod sa Daanbantayan ug ang iyang backrider nasuta nga walay kalabotan sa maong tulis dihang gipakita sa mga kawani.

Nasakiyo sa duha ka tulisan ang gibanabanang P20 mil nga cash ug alahas ingon man gadgets sa mga kawani nga sila si Jimmy Roa Lumanog, 36, Lovely Joy Lozada Santillan, 22 ug Ma. Luchie Rodrigo Arias, 24.

Si Malinao nadakpan human wa mohunong sa pagpara sa grupo ni Inspector Zenaido Sanchez sa Barangay Bacayan sa dakbayan sa Sugbo nga nag-followup sa maong kaso.

Gipara si Malinao nga dunay angkas niadtong tungora tungod kay wala magsuot og helmet ug temporary plate ra ilang plaka. Didto naabtan sa usa ka hardware si Malinao, apan nakaikyas iyang angkas nga miadto usab sa police station nianang pagkagabii.

Apan si Malinao mapriso gihapon kay wala kini lisensiya  ug may nakuhang kutsilyo sa U-box niini. - /EIM (BANAT NEWS)