Balaud batok panakop sa iho iduso

CEBU, Philippines - Gipasalig sa Bureau of Fisheries and Aquatic Resources nga moduso sila og balaudnon nga mapanalipdan ang mga iho sama sa thresher sharks aron dili sayun-sayunon sa pagkuha aron himoong sangkap sa fishballs ug tempura.

Apan matud ni Dr. Allan Poquita, assistant regional director sa BFAR-7 nga magkinahanglan kini og makuting pagtuon aron ilhon nga usa ka endangered species ang thresher sharks.

Nasayran ang kagamhanan sa Probinsiya sa Sugbo adunay ordinansa nga nagdili sa pagkuha sa mga thresher sharks apan adunay pipila nga suway gihapon nga mipalusot ug gibaliwala ang ordinansa.

Tungod niini ang BFAR-7 mohimo og massive information drive ug plano nga patas-an ang penalty sa pagkuha sa maong matang sa iho aron hingpit kining kapanalipdan.

Matud ni Poquita nga ang thresher shark usa sa mga ingredients nga gamiton sa mga tighimo sa tempura ug fishball hinungdan nga kusog ang palit niini.

Sa niaging semana, ang Provincial Anti-Illegal Fishing Task Force nakasakmit og mga karne sa ihong thresher shark sa dakbayan sa Naga nga giingong gikan sa Dumaguete City ug suway unta nga ipalusot paingon sa dakbayan sa Lapu-Lapu diin nahimutang ang buhatanan og tempora ug fishball. - /GMR (BANAT NEWS)