Mga mag-uuma sa siyudad palitan og hauling trucks

CEBU, Philippines - Nagtinguha ang kagamhanan sa dakbayan sa Sugbo nga mopalit og duha ka hauling trucks nga mohakot sa mga abot sa mga mag-uuma gikan sa bukirang bahin.

Ang City Agriculture Office nangayo og dugang P300 mil nga ipalit sa maong hauling trucks.

Si City Agriculturist Joey Baclayon miingon nga nagkantidad og usa ka milyon ka pesos ang duha ka hauling trucks.

Ang P300 mil idugang kini sa pondo sa CAO nga ipalit sa maong kahimanan.

Si Mayor Michael Rama uyon sa plano ni Baclayon sanglit makatabang kini sa mga mag-uuma ug gihuwat na lang ang pag-aprobar sa konseho sa siyudad.

Dul-an sa 28 ka barangay sa bukirang bahin sa Sugbo ang maserbisyohan sa duha ka hauling trucks nga maoy modala sa mga produkto nga iladlad sa kamerkaduhan.

Nagplano usab si Baclayon sa pagpalit og duha ka refrigerative van balor og P1.8 milyones.

Kini makatabang sa paghatud sa mga preskong utanon ngadto sa nagkadaiyang hotels ug restaurants sa dakbayan.

Ang CAO makig-alayon sa Cebu City Federation of Farmers Association and Cooperatives, Inc. sa pagpadangat sa maong serbisyo ngadto sa mga mag-uuma. (BANAT NEWS)