Nagtulis sa call center agent nadakpan

CEBU, Philippines - Nadakpan sa kapolisan ang suspetsado sa pagpanulis sa usa ka call center agent sa Barangay Maguikay, Dakbayan sa Mandaue alas-4 pasado sa miaging kaadlawon. Ang nadakpan mao si Joseph Abonales, 30, minyo, taga Sitio Sta. Cruz, Guizo sa maong dakbayan kinsa gitumbok nga mitulis kang Christopher Doron, 23, nagpuyo sa maong dapit.

Matud ni SPO1 Renato Canja sa Presinto 3 sa Mandaue City Police Office (MCPO)  nga naglakaw lang ang biktima pauli sa ilang panimalay dihang kalit kining gialihan sa suspetsado nga nagsakay og biseklita ug gitionan og armas nga kalibre 38. Gumikan sa kahadlok sa biktima, wala kini maglangan sa paghatag sa iyang knapsack nga gisudlan sa iyang cellphone, company ID, ATM card ug salapi nga P2,500. Human makuha ang maong mga butang, ang suspetsado daling nakasibat sakay sa biseklita.

Ang biktima mitaho sa Presinto 3 ug daling girespondehan nilang PO2 Gil Tomada ug kaubanan.

Si Canja miingon nga dihang nahidangat sila sa barangay Maguikay sa dalan M.L. Quezon maoy nakita sa biktima ang suspetsado nga nagsakay og biseklita hinungdan nga dali kining gidakop.

Daling girikisa sa kapolisan ang suspetsado ug nabawi ang cellphone ug kwarta apan wala na ang bag nga giingong gilabay na sa suspetsado. (BANAT NEWS)