Tulo ka tawo ang gipamusil, usa patay

CEBU, Philippines - Usa ang patay samtang duha ang naangol sa nahitabong pinusilay sa nagkalain-laing dapit sa dakbayan sa Sugbo.

Base sa imbestigasyon ni SPO4 Alex Dacua, imbestigador sa Homicide Section nga ang namatay mao si Gerwin Broncano, 27,  taga Huyong-Huyong, Mambaling samtang naangol ang usa ka menor de edad nga lalake sa nahitabong pinusilay kagahapon  alas 1:45 sa kaadlawon sa New Imus Road, Barangay T. Padilla ning dakbayan sa Sugbo. Si Broncano nakaangkon og pinusilan sa tuo ug wala nga bahin sa iyang ulo, duha sa may dughan ug usa sa iyang likod.

Samtang ang 15-anyos lumulopyo sa maong lugar nakaangkon ‘sab og mga pinusilan sa luyo nga bahin sa iyang lawas ug sa wala nga bahin sa iyang tiil apan nakadagan kini palayo sa mamumuno ug gitabang sa mga tanod pagdala sa Cebu City Medical Center.

Dugang impormasyon nga nakuha ni Dacua, ang tanod pinangulohan ni Raul Bardaje nakadungog og sunod-sunod nga buto sa armas gikan sa nahitaboan maong dali silang miresponde ug ilang nasugatan ang menor de edad nga nagdagan ug nagkadugo.

Na-rekober sa kapulisan ang lima ka kabhang sa .9mm ug duha ka kabhang sa .45 nga kalibre sa crime scene. Gisusi pa sa kapolisan kung unsay motibo sa maong pagpamusil ug kung si kinsa ang mga kriminal. Apan gituohan nga giatangan ang duha sa mga mamumuno.

Sa laing bahin, usa ka lalake ang nabiktima sa pagpamusil sa Unit 3 Carbon Public Market, Barangay Ermita Cebu City kagahapon sa buntag.

Si Val Alidon Zafra, 39, taga 139 MJ Cuenco Avenue, Cebu City naglingkod sa usa ka bangko dihang giduol ug gipusil sa wala mailhing tawo diha sa wala niya nga dunggan.

Ang biktima gidala sa mga tanod sa Cebu City Medical Center. Wa pa maestablisar sa kapolisan ang hinungdan sa maong pagpamusil.  (BANAT NEWS)