Mga armas, drugas nasakmit, ug unom ka tawo nadakpan
CEBU, Philippines - Nadakpan sa Provincial Intelligence Branch (PIB) ang usa ka level 2 drug pusher ug ang lima niini ka mga kauban diha sa Sitio Landing, Barangay Catarman, Liloan niadtong Sabado ug nakuhaa’g 25 gramos nga gituohang shabu ug walo ka mga armas.
Si Sr. Supt. Noel Gillamac mipresentar sa mga ebidensiyang nasakmit gikan sa suspek nga si Amerphil Jayme, apil sab ang mga kauban niini nga sila si Christian Ceniza, Edgardo Cetas, Donel Navales, Joelito Yutrago ug Fernando Aton.
Gipasalamatan ni Gillamac ang PIB nga gipangulohan ni Chief Insp. Rodulfo Albotra nga maoy nanguna sa maong buy-bust operation nga miresulta sa pagkasakmit sa maong shabu nga nagkantidad og P200 mil, mga armas nga naglakip sa usa ka shotgun, usa ka KG9, duha ka Ingrams, duha ka .45 caliber pistol, usa ka .9mm pistol ug usa ka .38 revolver.
Ang kauban ni Jayme nga si Ceniza, giila sab sa kapulisan nga usa sa mga labad sa ulo ug pinangita sa kapulisan sa Mandaue kay naapil kini sa local robbery gang ug uban pa nga krimen sa maong siyudad.
Matud pa ni Gillamac nga naabot pa sa Bohol ug uban pa mga silinga’ng lugar og supply sa drugas ang grupo ni Jayme. Nakuha sab sa kapulisan ang duha ka mga notebook sa mga suspek kun diin didto nakasulat ang mga pangalan sa iyang mga kostumer ug tag pila sab ka kilo ang ilang mabaligya matag adlaw ug semana.
Sa maong kalamboan, gimandoan ni Gillamac ang PIB nga subayon ang maong mga pangalan aron ma-monitor, susihon usab nila kung wala bay mga polis ug politiko nga nagpaluyo sa maong grupo gumikan sa kadako sa ilang operasyon.
Gidugang pa ni Gillamac nga duna ‘sab silay nakuha nga impormasyon nga ang mga drug syndicate mikuha kini og mga kriminals aron maapil sa ilang grupo. (BANAT NEWS)
- Latest
