Negosyante naligsan sa bus nga iyang gikanaogan

CEBU, Philippines - Duha ka mga tawo ang nakalas sa managlahing aksidente sa kadalanan, usa kanila naligsan sa mismong bus nga bag-ohay pa niyang gikanaogan diha sa Sitio Bulubogan sa Barangay Tajao, lungsod sa Pinamungajan niadtong Domingo sa gabii.

Sumala pa sa imbestigasyon sa kapolisan, mao pay pagkanaog sa biktimang si Martin Vallejo, 50, sa Ceres Bus dihang naligsan siya niini .

Si Vallejo kinsa usa ka biyudo ug negosyante og kahoy nga taga barangay Ibo dakbayan sa Toledo, gikatahong diha miagi sa atubangan sa bus human sa iyang pagkanaog ug wa mabantayi sa drayber nga si Randy Degito, taga Seaside, Pajo dakbayan sa Lapu-Lapu maong naligsan kini.

Daling gidala ang biktima sa Pinamungajan district hospital apan gideklarar kining dead on arrival.

Samtang nalatayan gyud sa ligid sa primemover ang ulo sa usa ka 61-anyos nga lalaki nga giingong hubog diha sa Barangay Giwang, Alcoy. Ang biktima nga patay dihadiha naila nga si Anecito Medellin, nga nagpuyo sa Sitio Guisalgan, Barangay Daanlungsod, Alcoy.

Matud pa ni PO2 Erland Salonoy sa Alcoy Police nga nahinabi sa Banat News, nga gikan mitambong sa pista sa kasikbit nga barangay ang biktima kauban ang iyang igsuon ug hubog na kini nga miuli sa ilang panimalay.

Wa makabantay ang igsuon niini nga si Domingga Bensing nga nagsusapinday na ang igsuon diha sa tunga sa dalan ug kalit lang nalatayan sa primemover. Ang drayber sa maong trak nga si Necky Bayo, 26, taga Dansulan, Bais, Negros Occidental mitug-an sa kapulisan nga wala na siya maka-brake kay kalit kaayo ang hitabo.

 (BANAT NEWS)