CIDG-7 miabag sa Davao police sa King murder

CEBU, Philippines - Ang Criminal Investigation and Detection Group-7 mihatag na og initial profile sa Sugboanong negosyante nga si Richard King ngadto sa Davao City Police Office nga gipusil patay sud sa iyang buhatan sa miaging semana.

Matud ni Police Senior Superintendent Ritchie Medardo Posadas, hepe sa CIDG-7 mihangyo ang city director sa DCPO ug CIDG-11 nga tabangan sila sa pagpangita og mga impormasyon bahin sa pagkatawo ug kalihokan ni King aron makatabang sa ilang imbestigasyon.

Mas gihatagan nila karon og dakong pagtagad ang anggulo kabahin sa negosyo ilabi na nga dunay report nga giingon adunay nakabikil sa mga lugar nga gibutangan sa iyang negosyo si King nga naglakip sa Cebu, Davao ug sa Boracay, Aklan

Gitan-aw ‘sab nila ang posibilidad nga lumad nga taga-Sugbo ra ang responsable sa pagpusil patay ni King, base kini sa pamahayag sa DCPO.

Samtang aduna nay cartographic sketch sa hulagway sa gunman apan di pa kini ipagawas sa kapolisan. Daan nang misaad og ganti nga salapi ang pamilya ni King ug sa mayor sa Davao nga si Mayor Rodrigo Duterte niadtong tawong makahatag og impormasyon pagtumbok sa gunman o ba kaha mastermind sa maong pagpatay. Matud pa nga si Duterte misaad og P300 mil samtang P200 mil gikan sa pamilya ni King.  Apan supak si Cebu City Mayor Michael Rama sa paghatag og ganti sa makatabang sa imbestigasyon sanglit matud pa niya nga trabaho sa kapolisan ang pagpangita sa killers ug dili angay isangon sa publiko. (BANAT NEWS)