Mga bata giharos sa jeepney
CEBU, Philippines - Pito ang naangol, apil ang lima ka mga elementary students human sila gidaro sa usa ka jeep pasaheroan nga nawad-an og kontrol ang drayber diha sa eskina sa V. Rama ug M. Velez Street sa Barangay Guadalupe ning dakbayan sa Sugbo kagahapon sa udto.
Giila ang drayber sa jeep nga duna’y rota gikan Colon paingon sa Guadalupe, nga si Jose Maghanoy, 47, nga taga M. J Cuenco Avenue ning dakbayan.
Matud pa sa drayber nga sa dihang mohunong na unta siya sa V. Rama, Corner M.Velez Street tungod kay red light na man ang traffic lights, apan nabantayan niya nga dili na makontrol ang manobela sa iyang jeep ug didto na kini milahos sa kilid sa kalsada, ayha pa niini natumban ang brake. Lima ka mga estudiyante nga paingon na unta sa ilang klase ang nabanggaan ug naangol nga sila si Emmanuel Luciano, 11; Jasper Ian Gelimer, 10; Andrea Limpot, 11; Diane Hijara, 13; ug Lyka Econas,11, pulos taga Barangay Banawa.
Duha ‘sab ka mga hamtong ang naangol diin ang usa naila nga si Lareta Cabanero,38, nga taga Carcar City, Cebu.
Gawas sa mga biktima giharos usab sa jeep ang usa ka kotse ug mga metrohan sa tubig sa Metro Cebu Water District (MCWD). Si Joy Tumulak ang operations chief sa City Traffic Operations Management (CITOM) nagkanayon nga base sa imbestigasyon naapiki ang drayber gumikan sa problema sa manobela.
Matud pa ni Tumulak nga dunay upat ka pasahero sulod sa maong jeep apan luwas silang tanan. Samtang gitug-an ‘sab sa drayber nga naa lang sa 15 hangtod 20 kilometros kada oras ang iyang dagan apan nakabantay siyang duna’y mipiti sa iyang manobela.
“Ingon siya (Maghanoy) nga mura’g dunay naputol sa manobela ug human ato dili na siya ka kontrol. Duna pa hinuon untay brake pero naglisod na gihapon siya og kontrol,†matud pa ni Tumulak.
Dali nga gidala sa tambalanan ang mga biktima, upat sa Cebu City Medical Center (CCMC) ug tulo sa Vicente Sotto Memorial Medical Center (VSMMC).
Ang drayber sa jeep, gitanggong na karon sa detention cell, nga mag-atubang og kasong reckless imprudence resulting to multiple physical injuries and damage to properties. (BANAT NEWS)
- Latest
