Traffic signal lights angay’ng ayuhon

CEBU, Philippines - Ang kadagkoan sa City Traffic Operations Management miawhag sa mga konsehal sa dakbayan nga tabangan ang CITOM aron gahinan sila og P27 milyones sa Supplemental Budget nga gastuhon pagpaayo sa mga traffic lights dinhi sa siyudad.

Ang CITOM Board nga gipangulohan ni Chairman Ruben Almendras mitataw nga kadaghanan sa mga traffic lights nga nahimutang sa 78 ka dagkong mga eskena dinhi sa dakbayan dili na “interconnected” sa matag usa.

Matud sa mga sakop sa CITOM Board nga kinahanglang ayuhon g’yud dayon ang mao nga mga gubaon nga traffic lights aron dili masinati ang grabe nga problema sa trapiko tungod sa pagdaghan sa mga sakyanan.

Matag tuig, ang gidaghanon sa mga sakyanan dinhi sa Central Visayas madugangan og kapin sa 20 mil, ug kadaghanan niini ania magdaganan sa dakbayan sa Sugbo ug silingan nga mga siyudad.

Ang rekord sa Land Transportation Office (LTO) nagpakita nga gikan sa 625,318 ka sakyanan nga narehestro sa Central Visayas kaniadtong 2012, misaka kini ngadto sa 652,828 sa miaging Disyembre.

Ang mga dagko nga eskena sa dakbayan gipangtauran kini og mga koneksyon nga gitawag og Sydney Coordinated Adaptive Traffic System (SCATS) kaniadtong 1991, apan daghan niini naguba na.

Ang mga dagkong eskena gipangtauran og mga pino nga alambre aron mohatag og signal sa computer sa CITOM aron konektado ang tanang traffic signal lights. Base sa mao nga sistema, kun ang sakyanan natural lang ang pagdagan, diritso-diritso ra ang iyang pagdagan kay ang SCATS maoy magkontrolar sa mga sakyanan.

Hatagan niini og taas nga higayon sa “Go Signal” ang karsada nga adunay daghang mga sakyanan. Ang mga gagmay’ng alambre sa SCATS nga gilubong duol sa pedestrian lanes nangabugto tungod sa pagkurog inig-agi sa sakyanan ug ang uban naguba kay gitabonan sa subli nga pag-aspalto. (BANAT NEWS)