Karsada giundangan na pag-aspalto DPWH nagmika ug wala magtagad

CEBU, Philippines - Hangtod karon, wala pa gayud humana sa pag-aspalto sa mga kontraktor nga gikuha sa Department of Public Works and Highways (DPWH) ang Veterans Drive ug ang Gorordo Avenue.

Ang Gorordo Avenue gikan sa eskena General Maxilom Avenue, duol sa Colegio dela Inmaculada Concepcion, paingon na sa Salinas Drive sa Lahug, gikontrata kini og P33.9 milyones sa Ven Ray Construction. Daghang mga motorista ang mireklamo ngano nga gibiyaan nila ug wala tiwasa ang pag-aspalto sa karsada unahan nga bahin sa Lahug Elementary School paingon na ngadto sa Salinas Drive?

Dunay nagduda nga gibiyaan na kini sa hingpit sa mao nga kontraktor ug gipasagdan ra usab sa kadagkoan sa DPWH. Ang karsada nga gibunyagan og Veterans Drive, kanang tungasan paingon sa Marco Polo Plaza Hotel ug paingon na sa Busay, nagputol-putol ang pag-aspalto.

Ang WTG Construction mao usab ang nakadaog sa kontrata sa pag-aspalto sa Veterans Drive. Mga motorista nga mag-agian sa mao nga dapit nagduda na g’yud kun ngano nga wala tagda ni DPWH-7 regional direktor Ador Canlas ang mao nga sitwasyon.

Kwarta nga gikan sa nasudnon nga kagamhanan ang gigasto sa pagpa-aspalto niini nga mga karsada. (BANAT NEWS)