Nagmanehong walay lisensiya nagdala pa gyud og pusil nadakpan

CEBU, Philippines - Nagtingkagol sa Ronda Police Station detention cell ang usa ka lalaki kinsa nasakpang nagdala og pistola atol sa gipahigayong aggressive patrolling sa kapolisan sa lungsod niadtong Huwebes sa  gabii.

Ang nasikop mao si Mark Genterone, 28, taga Maigang, lungsod sa Barili ang naimbargohan og kalibre .45 nga pistola.     

Base sa taho sa kapolisan nga samtang nagpahigayon sila og aggressive patrolling sa kadalanan nasigpatan nila si Genterone nga nagmaneho og motorsiklo ug ila kining

 gipara.

Nihunong si Genterone apan wala kini makapakita og driver’s license dihang gipangitaan sa mga polis hinungdang girekisa.

Dihang gipaablihan sa mga polis ang utility box sa motor nakita sa mga polis ang nahisgutang pistola nga dunay upat ka mga bala.

Nunot niini, laing motorsiklo ang gipara sa mga polis kinsa ang drayber nailhan nga si Rolito Fuentes, taga Libo-o, Ronda ang misirit og dagan paingon sa ngit-ngit nga lugar dihang rekisahon unta sa mga polis.

 Si Fuentes wala na kini maabti sa mga polis nga migukod kaniya.

Dihang gisusi ang motor sa suspetsado nasuta nga may usa ka kalibre.38 nga pusil nga dunay usa ka bala diha sa utility box. Si Fuentes padayon kining gipangita sa mga polis.  (BANAT NEWS)