SWAT sa Talisay wala pay mga ekipo

 CEBU, Philippines - Ang Special Weapon and Tactics (SWAT) sa dakbayan sa Talisay wala pa kini mga ekipo apan matud ni Mayor Johnny De los Reyes naghuwat na lang siya nga masumitir ngadto sa iyang buhatan ang program of works sa mga gikinahanglang ekipo sa SWAT.

Si De los Reyes kinsa maoy chairman sa peace and order council sa siyudad nagkanayon nga gimanduan na niya ang city administrator niini nga magpagahin og budget alang sa ekipo sa SWAT.

Ang hepe sa Talisay City Police Station nga si Superintendent Reycel Carmelo Dayon mibutyag nga ang dakbayan sa Naga maoy migahin og pundo sa pagpahigayon og training sa mga SWAT ug walo ka polis sa Talisay ang naapil sa maong training.

Gibutyag ni Dayon sa milabay’ng duha ka semana ang hepe sa kapolisan sa probinsiya nga si Senior Superintendent Noel Gillamac mibisita kang De los Reyes diha sa iyang buhatan.

Matud ni Dayon nga si Gillamac misugyot kang De los Reyes nga helmet ug bullet proof vest lang   una ang paliton nga ekipo sa SWAT sa siyudad ug ang isyu nga M16 rifle sa mga polis sa TCPS mao lang una ang gamiton nga armas sa mga miyembro sa SWAT samtang ang siyudad dili pa makapamalit og mga armas alang gyud sa SWAT.

Gibutyag ni Dayon nga samtang dili pa usab makapalit og sakyanan sa SWAT ang siyudad misugyot usab siya sa mayor nga mga motorsiklo lang una ang paliton.

Gipasabot ni Dayon nga ang motorsiklo magamit kini sa pagsulod sa mga suoton nga lugar.

Sa pagkakaron ang mga miyembro sa SWAT temporaryo kining gidestino isip mga beat patrol diin tumong niini nga masuhito sila sa mga lugar diin dunay taas ang krimen ug sa mga suoton usab nga lugar sa Talisay.

Matud ni Dayon nga ang buhatan sa SWAT anha sa ubos sa city hall diha sa nahimutangan sa detention cell.

Ang detention cell tungaon kini ug ang katunga maoy himuong buhatan sa SWAT.  (BANAT NEWS)