Bulan sa marso maoy daghan og krimen — LCPO

CEBU, Philippines - Ang bulan sa Marso maoy dunay labing daghang krimen nga nahitabo sa unang kwarter sa tuig 2014 sa dakbayan sa Lapu-Lapu base sa talaan sa Lapu-Lapu City Police Office. Sumala pa sa LCPO, dunay 161 ka kaso nga natala sa Marso, gisundan sa bulan sa Enero nga nagtala og 130 ug ang bulan sa Pebrero ang labing gamay nga natala  sa gidaghanon nga 124 ka mga krimen.

Apan sa bulan sa Enero maoy dunay daghang kaso sa pagpatay o murder nga mitala og lima, sunod ang bulan sa Pebrero nga dunay upat ug duha sa bulan sa Marso.

Sa kasong homicide maoy natala ang duha sa bulan sa Enero ug laing duha sa bulan sa Marso apan labing daghan usab ang mga naangol nga biktima sa pagpanunggab o pagpangulata ang bulan sa Marso nga maoy natala ang 27 ka mga biktima, 20 ang bulan sa Pebrero ug 19 ang bulan sa Enero.

Sa kaso sa pagpanglugos, sa bulan sa Marso nakatala og  lima ka biktima, gisundan sa bulan sa Enero nga adunay upat ka biktima ug adunay duha usab sa bulan sa Pebrero.

Samtang sa kasong robbery nga nahitabo sa maong dakbayan maoy nag-una sa gidaghanon ang bulan sa Enero niining tuiga nga adunay 39 ka mga kasong pagpanulis, gisundan kini sa Marso nga adunay 38 ka mga natala nga kaso sa pagpanulis ug 36 usab ang natala sa bulan sa Pebrero.

Sa kaso nga pagpangawat sa maong dakbayan maoy nag-una nga labing daghan nga nahitabo ang bulan sa Marso nga adunay 112, gisundan kini sa bulan sa Pebrero nga adunay 81 ug ang bulan sa Enero maoy natala ang 79 ka mga kaso sa pagpangawat.

Sa kaso sa pagpangarnap nga naglakip na niini ang motorsiklo maoy nag-una sa gidaghanon ang bulan sa Enero nga dunay 12 ka kaso, gisundan sa Marso nga adunay 11 ug  ang bulan sa Pebrero nagtala usab og pito ka mga kaso sa pagpangarnap og sakyanan.  (BANAT NEWS)