Manghud gitigbas sa maguwang

CEBU, Philippines - Napahak ang ulo sa usa ka lalaki human gitigbas sa iyang maguwang ginamit ang sundang sa Sitio Camolinas, Poblacion, Cordova niadtong Huwebes sa hapon.

Ang biktima mao si Cesario Quijano, 32, ug ang nagtigbas mao ang iyang maguwang nga si Alberto Quijano, 42, pulos taga Bohol ug kasamtangang nagpuyo sa Cordova.

Asoy sa mga silingan nga naglalis ang magsoon daplin sa karsada.

Human sa pipila ka gutlo, nagdaling nipauli sa ilang panimalay si Alberto apan nibalik dala ang sundang nga maoy gigamit pagtigbas kang Cesario.

Nakaangkon og daghang samad sa ulo ang biktima lakip na sa bukton nga maoy gisagang sa mga pagtigbas nga gihimo sa iyang maguwang.

Matud ni PO3 Rovilo Librado sa Cordova Police Station nga ang mga silingan na ang midali pagdala sa biktima sa Lapu-Lapu City Hospital apan gibalhin sa Vicente Sotto Memorial Medical Center sa dakbayan sa Sugbo.

Wala pa matino sa kapolisan ang hinungdan sa panaglalis sa managsoon tungod kay ang biktima dili pa nila mahinabi samtang nakasibat ang suspetsado pahilayo sa lugar.  (BANAT NEWS)