CCPO may listahan na

CEBU, Philippines - Duna na’y listahan ang Cebu City Police Office (CCPO) sa mga polis sa Talamban Police Station nga gidudahang apil sa kalihukan sa ilegal nga drugas.

Matud ni CCPO Director Noli Romana nga pangan sa mga polis gihatag gikan sa mga barangay opisyal sa Pulangbato.

Usa sa mga plano ni Romana ang paghimo og fact-finding committee nga maoy mosusi sa impormasyon gumikan sa ka seryoso sa alegasyon.

Kini langkuban sa kapolisan ug Police Community Advisory Council (PCAC) aron mas paspas ug patas ang himoong imbestigasyon.

Wala pa hinoon matino kung kanus-a umulon  ang komitiba.

Ang hepe sa Talamban Police Station, Senior Insp. Bienvinedo Miral, nga nahinabi sa Banat News, mihangop sa maong kalamboan.

Matud ni Miral nga ila nang gisulayan pagduol ang mga opisyal sa Pulangbato apan wala sila’y nakuha nga impormasyon. Nakasabot hinoon ang opisyal kung dili makig-alayon kanila ang mga barangay opisyal sa maong lugar gumikan kay iya mang mga sakop ang gidudahan.

Gipasalig ni Romana nga andam ang iyang buhatan mohatag og seguridad sa bisan kinsa nga mohatag og affidavit may labot sa maong alegasyon.

Nakasabot si Romana nganong mahadlok ang ubang tawo mohatag og impormasyon apan kini lang ang nakita niya nga angayang buhaton aron mahibaw-an gyud ang kamatuoran sa maong alegasyon. (BANAT NEWS)