Pataka pamaligya’g butane dakpon
CEBU, Philippines - Nakig-alayon ang Department of Energy sa Cebu City Traffic Operations Management (CITOM) batok sa pagkuyanap sa refill nga butane canisters.
Gipahibawo ni DOE-7 Director Antonio Labios nga may giumol na silang technical working group agi og tubag sa problema.
Apan nagkinahanglan sila sa abag sa mga lokal nga kagamhanan aron mas mapalapdan pa ang ilang himoong information campaign ngadto sa barangay level.
Matud ni Labios nga apil ang namaligya ug ang mopalit sa refilled nga butane canister ang pahamtangan og silot.
Asoy sa legal officer sa DOE-7, Atty. Russ Mark Gamallo, nagkadako ang coverage sa violation ug multa base sa ilang department circular.
Kung kaniadto anaa lang sa usa ka libo hangtod sa tres mil pesos ang multa, karon gihimo nang P50,000 hangtud P60,000 matag kalapasan.
Nakuha ang pagtagad sa CITOM dihang ilang nakita sa kadalanan nga adunay mga nagmotorsiklo nga magkarga og daghang refilled nga butane canisters.
Ang operations officer sa CITOM, Joy Tumulak, mibutyag nga nakita sa CITOM Board nga risgo kini kaayo sa mga motorista hinungdan nga nakig-alayon dayon sila sa DOE.
Samtang si Engr. Rey Maleza sa Energy Industrial Management Division miingon nga plano nila karon nga ang tanang namaligya og butane canisters pakuhaon og standard compliance certificate.
Hinuon nagpadayon pa karon sa pagproseso ang DOE tungod sa kadaghan sa mga aplikante nga gustong makakuha sa standard certificate compliance.
Daan nang nipa-himangno ang DOE nga delikado ang paggamit sa refilled nga butane canisters ug kinahanglan inig human og gamit lumpingon ug ilabay sa basurahan aron dili gamiton pagbalik. (BANAT NEWS)
- Latest
