Mga silingan sa P8M shabu ‘couriers” di makatoo sa balita

CEBU, Philippines -  Silingan sa inahan ug anak nga nasakmitan og usa ka kilong shabu nga balor P8 milyones diha sa Lorega-San Miguel ning dakbayan sa Sugbo, dili makatuo nga nalambigit ang duha sa illegal drugs.

Kini human gikahinabi sa Banat News ang silingan sa mga suspek nga sila si Editha ug Maricris Paul, sud na sa napulo ka tuig nga si Cherry Booyaban diha sa Sitio San Roque sa maong barangay. Nasuta usab nga apil sa mga nabiktima sa dakong sunog ang mga suspek.

Ang manag-inahan nasikop sa Philippine Drug Enforcement Agency (PDEA) 7 sa nakalabay nga adlaw ug nakuhaan og usa ka kilo nga shabu nga gisud sa package sa mga sandals gikan sa Alabang, Muntinlupa.

Ang panimalay ni Editha ginama lamang sa plywood nga gibanabana ang gidak-on nga naa sa 30 hangtod 50 square meter, nga wala sab kaayo’y mga appliances sulod sa balay ug trapal lang ang gihimo niini nga babag sa ubang parte sa balay nga wala pa mabutangan og plywood.

Samtang si Lorega Councilor Joan Babaysol mibutyag sab nga halos napulo na ka tuig nga nagpuyo sa ilang lugar si Editha nga dunay alyas nga “Jojo” apan wala sila sukad malambigit sa ilegal nga kalihokan.

Karong adlawa pasakaan na og kaso ang manag-inahan diha sa Cebu City Prosecutor’s Office sumala pa ni David Mark Maramba ang operations officer sa PDEA-7.

Sa laing bahin, ang pangulo sa PDEA-7 nga si Esperideon Javier miawhag sa mga hingtungdang ahensiya nga pahugtan og maayo ang mga pwerto sa lalawigan sa Sugbo batok sa pagpayuhot niining mga illegal drugs.

Si Javier miingon nga duna’y 29 ka mga pantalan dinhi sa Sugbo apan kadto rang kanunay nga dunggoanan sa daghang mga barko maoy hugot ang seguridad apan mas daghang gagmay’ng pantalan ang dili hugot ang pagbantay.   (BANAT NEWS)