Social worker gikuotan P25 mil

CEBU, Philippines - Igo na lang sa pagpa-blotter sa kapolisan ang usa ka social worker sa Vicente Sotto Memorial Medical Center (VSMMC) human nadala sa mangunguot ang iyang pitaka nga dunay sulod P25 mil.

Ang nabiktima sa pagpanguot naila nga si Daisy Bonghanoy, 33, dalaga ug nagpuyo sa may dalan D. Jakosalem ug F. Ramos, dakbayan sa Sugbo.

Asoy sa biktima sa Fuente Police Station nga alas 5:45 sa hapon niadtong Sabado samtang siya sakay sa pasaheroan nga jeep gikan sa F. Ramos ug paingon sa usa ka mall sa Fuente Osmeña iyang nabantayan nga abli na ang iyang bag ug nawala na ang iyang brown nga pitaka.

Nakuha sa mangunguot ang iyang kwarta ug duha ka ATM cards ug PRC ID.

Nagduda ang biktima nga ang iyang tapad nga lalaki nga desente ang porma ug may pagka-chinito pa ang dating, ug gibanabanang 30 ngadto sa 40 anyos ang pangedaron ang nagkuot sa iyang bag.

Si Chief Insp. Wildemar Tiu, hepe sa Fuente Police nga nahinabi sa Banat News, miingon nga ilang gipatan-aw ang biktima sa hulagway sa mga notadong mangunguot sa lugar apan pakyas kini sa pag-ila. (/GMR)(BANAT NEWS)