Guwardiya nagmaoy sulod sa bar

CEBU, Philippines - Gisikop sa Mobile Patrol Group ang usa ka nagpailang guwardiya human kini nagpakita sa iyang dala nga revolver sa dihang nahubog alas 3:30 gahapon sa kadlawon sa Dark Planet Restobar, dakbayan sa Sugbo.

Ang gisikop giila nga si Jess Nazar Esdrellon, 23, ulitawo, nagbantay sa Ironic Internet Café sa dalan Colon ug lumad nga taga Barangay 6 Poblacion, Tuburan, ug nakuhaan og .38 revolver nga dunay duha ka bala ug tulo ka basiyo.

Sila si PO1 Joey Dairocas ug PO1 Cesariano Parayaoan sa MPG ang dali nga miresponde human dunay mitawag kanila kabahin sa armadong tawo.

Dihang gipangayoan kini og lisensya sa iyang dala nga revolver, gipakita hinoon niini ang usa ka Security License Card apan nasakpan sa polis nga dili iyaha ang hulagway nga nakabutang sa maong ID hinungdan nga dali kining gisignit sa kapolisan.

Matud sa dinakpan nga iya lang nakit-an ang maong ID card nga iya ni Ariel Quidet Ando ug iya nalang kini nga gitagoan.

Giangkon usab ni Esdrellon nga wala siya’y dala nga lisensya sa iyang revolver ug pang-souvenir lang unta niya ang maong armas ug mga bala.

Gipaubos na sa ballistic examination ang revolver sa guwardiya aron pagsubay kung wala ba kini nagamit sa uban pang krimen.

Gitanggong na karon sa Pari-an Police detention cell ang dinakpan nga gikatakdang pasakaan og kalapasan sa R.A 10591 o paghupot og ilegal nga armas. (BANAT NEWS)