Napulo ka balay naugdaw sa Mandaue

CEBU, Philippines - Naluwas ang duha ka bata nga nagdula sa sulod sa panimalay nga kalit nasunog ug nakaamong pa sa laing siyam ka balay ala-1:08 ang takna kagahapon sa hapon sa Barangay Alang-Alang, Dakbayan sa Mandaue.

Si SFO1 Julius Lloua, imbestigador sa Bureau of Fire and Penology (BFP) sa dakbayan sa Mandaue nga nahinabi sa Banat News miingon nga 34- minutos pa ang milabay una nila kini nakontrolar  sa Task Force Alpha. Nagsugod ang kalayo sa ikaduhang andana sa panimalay nga gipanag-iya ni Rosemarie Maluluy-on. Matud pa nga ang duha ka bata nga kwatro ug singko anyos ra maoy nahibilin sa balay.

Matud pa niya nga pulos ginama sa light materials ang mga balay nga nagsikitsikit ug suwerte kaayo nga mibali ang huros sa hangin ug ang kalayo mipaingon ngadto sa karsada hinungdan nga wa kini mokatap sa ubang kabalayan.

Sumala pa ni Lloua nga si Maluluy-on miangkon nga naputlan sila og kuryente. Wa hinuon mahibaw-i kun naduwa ba og kandila ang duha ka mga bata nga maoy nakaingon sa maong sunog.

Lakip sa mga naugdaw mao ang mga balay nga gipanag-iya nila ni Jesus Mediña, Analyn Quequelete, Labella Jurak, Masie Villaroso, Marue Viral, Celia Villanueva, Cherry Sienet ug  Ramil Daclitan.

Nakan-an usab sa kalayo ang panimalay nila ni Roy Lumapas ug Josephine Fernando.

Mitabang sa pagpawong sa sunod ang kabomberohan gikan sa Cebu City, Lapu-Lapu, Consolacion, Filipino Chinese Volunteer Fire Brigade, Emergency Rescue Unit Foundation (ERUF).

Si Roger Paller nga maoy Public Information Officer (PIO) sa dakbayan miingon nga temporaryo nga ipahimutang ang mga biktima sa mga tulda samtang ang City Social Welfare and Development Office (CSWDO) nagpadala na usab og pinutos nga pagkaon ngadto sa mga biktima. (BANAT NEWS)