Tulisan nag-pusher sikop

CEBU, Philippines - Nasikop sa mga sakop sa Provincial Anti-Illegal Drugs Special Operation Task Group (PAIDSOTG) ang notadong tulisan ug drug pusher sa probinsiya sa Sugbo atol sa buy-bust operation niadtong Sabado sa hapon sa Barangay Cogon, Cordova.

Human sa pipila ka surveillance nga gihimo sa operatiba miresulta kini sa pagkasikop ni Danileto “Danny” Bontuyan Lopez, 43, nagpuyo sa maong lugar.

Nakuha gikan kang Lopez ang tulo ka dagku ug duha ka medium nga pakete sa shabu nga mobalor sa P100,000; digital weighing scale, drug paraphernalia, budol money nga adunay tinuod nga P500 sa ibabaw, .38 pistol nga adunay magazine ug lima ka bala, laing magazine sa samang kalibre nga adunay lima ka bala, holster, Nissan nga sakyanan (JDN 535), ug cellular phone.

Ang mga ebidensiya gidala sa Philippine National Police Crime Laboratory-7 sa Camp Sotero Cabahug alang sa chemical analysis ug ballistics examination.

Matud ni SPO1 Reynaldo Solante, team leader, ang transaksyon nahitabo sa pinuy-anan sa suspek diin usa ka medium nga pakete ang gipalit bugti sa budol money.

“Nagsakay na siya sa sakyanan unya nisulod pa gyud sa balay kay magkuha sa item unya diha nang ubang ebidensiya sa iyang sakyanan klaro na kaayo,” matud ni Solante.

Diha na gisikop ang suspek human gitunol ang ilang gipalit nga shabu ug wala na usab misuway pagsukol si Lopez.

Matud ni Solante nga si Lopez ikaduha sa pinakanotadong tulisan sa probinsiya ug anaa sa target list sa Provincial Intelligence Branch.

Gawas niini, level one drug pusher usab si Lopez nga mohalin og sobra sa 25 gramos nga shabu matag semana.

“Kusog gyud ni siya sa tulis kaniadto unya nahunong nibalhin na pud og shabu unya iyang area ang Consolacion pero init naman siya ngadto maong nibalhin sa Cordova,” matud ni Solante.

Ang PIB mitan-aw na karon kung unsay mga pending nga kaso ni Lopez samtang magtingkagol sa karsel sa Consolacion Police Station ug pasakaan og kasong ilegal nga paghupot og armas ug pagpamaligya og ginadiling drugas.—(BANAT NEWS)