Drayber nga nanghagit og sinumbagay gidakop

CEBU, Philippines - Gidakop ang traysikol drayber tungod sa pagpanghagit og sinumbagay sa traffic enforcer sa dakbayan sa Mandaue didto sa dalan P. Burgos, Barangay  Alang-Alang, dakbayan sa Mandaue kaniadto’ng Biyernes sa gabii.

Si PO1 Jerome Lendio miila sa drayber nga gidakop nga mao si Diego Rodriguez, 44-anyos, minyo ug taga  Barangay Paknaan, dakbayan sa Mandaue.

Matud ni PO1 Lendio nga ang traffic enforcer sa Traffic Enforcement Agency of Mandaue (TEAM) nga si Virgilio Aleviado, 58 anyos nga nadistino sa dalan P. Burgos nakamatikod ni Rodriguez nga nakahimo og kalapasan sa lagda sa tukma nga pagmaneho og sakyanan.

Kini ang hinungdan nga dali kining gisita ni Aleviado ug gipahunong sa unahan ug dihang iyang giduol sa pagpangayo og lisensiya ug giawhag sa pagpadaplin sa  karasada.

Pagduol ni Aleviado sa traysikol drayber ug gipangayoan sa iyang lisensya, wala kini manumbaling ug mipabulhot na hinuon pagpadagan sa iyang sakyanan maoy hinungdan nga nahitabo ang ginukdanay.

Dali nga nakapangayo og panabang sa mga kauban si Aleviado ug naalihan ang traysikol sa pag-abot niini sa unahan. Diha nga gipangayoan og lisensiya, nasuko si Rodriguez ug nanaug sa iyang gimaneho nga traysikol, dayon nanghagit og sinumbagay.

Si PO1 Lendio miingon nga gidakop si Rodriguez sa mga traffic enforcer ug gihatod sa Mandaue City Hospital ug sa liquor test nga gipahigayon nagpakita nga nakainom kini og ilimnong makahubog.

Gibalhog sa detention cell sa Presinto 1 si Rodriguez ug pasakaan siya’g kaso nga paglapas sa bag-ong balaod nga pag-drive og sakyanan nga nakainom ingon man Republic Act 4136 ang ipasaka batok kaniya kay matud pa walay lisensiya si Rodriguez.  (BANAT NEWS)