Marine protest gipaabot
CEBU, Philippines - Ang Philippine Coast Guard (PCG) Cebu Station naghuwat karon sa marine protest sa cargo vessel ug sa pump boat nga nabanggaan niadtong Biyernes sa hapon diha sa kadagatan sa Barangay Marigondon, dakbayan sa Lapu-Lapu.
Si Lieutenant Junior Grade Rodante Rodriguez sa PCG nga nahinabi sa Banat News kagahapon nagkanayon nga naghuwat sila sa isumitir nga marine protest sa M/V SS Provider ug sa pump boat nga Boyla 4 ug Super Blue.
Ang nahisgutang cargo vessel kinsa ang kapitan mao si Eliseo Galapin gipanag-iya kini sa Sea Ford Shipping Lines.
Samtang ang duha ka pump boat gipanag-iya kini sa Boyla diving shop diha sa Marigondon.
Matud ni Rodriguez nga sa ilang nadawat nga report ang cargo vessel gikan kini sa Davao ug giingong nagkarga og mga semento paingon ngadto sa lungsod sa San Fernando.
Sukwahi sa unang nahatag nga report sa PCG-Cebu Station sa miaging gabii, ang Boyla 4 dunay sakay nga tulo ka tripulante ug duha ka guests ang napagngan sa makina diha sa kadagatan sa Marigondon.
Matud ni Rodriguez nga ang Super Blue ang mi-rescue sa Boyla 4 apan nabanggaan na hinuon ang walang bahin sa atubangan niini sa cargo vessel hinuon walay mga naangol sa maong aksidente. (BANAT NEWS)
- Latest
