Lalaki gidunggab sa liog sa iyang kapuyo
CEBU, Philippines - Grabeng naangol ang usa ka habalhabal drayber nga giliog pagdunggab sa iyang kapuyo atol sa ilang panaglalis sa sulod sa ilang balay sa Barangay Tabok, Dakbayan sa Mandaue kagahapon sa kaadlawon.
Ang biktima mao si Reynante Cualbar, 38, lumad nga taga lungsod sa Tuburan, Cebu ug ang suspetsado mao si Jonalyn Bacarro, 23, nga lumad nga taga Lumampao, Kanlaon City, Negros Oriental.
Si SPO1 Edmund Bilacora sa kapolisan sa Presinto 3 sa Mandaue City Police Office (MCPO) miingon nga pangabubho maoy hinungdan sa panaglalis sa duha diin nasukmagan sa lalaki ang babaye.
Tungod sa kalagot sa babaye, mipunit kini og kutsilyo ug gihansakan ang liog sa lalaki.
Ang suspek dihang nadakpan miangkon sa krimen ug mipasangil nga kanunay na siyang kulatahon sa biktima. (/EIM)(BANAT NEWS)
- Latest
