Inahan sa babayeng gipatay sa kapuyo dako ang pagmahay
CEBU, Philippines - Miabot na kagahapon sa buntag ang inahan ni Ashela Antipuesto, ang babayeng gipatay sa iyang kapuyo gumikan sa selos diha sud sa ilang apartment ug pagkahuman gisunod sa pagpatay sa suspek ang kaugalingong maguwang nga gidudahan niining karelasyon ni Ashela.
Si Eleuteria , 63, dako ang pagmahay ngadto sa suspek nga si Flint Toling, tungod kay buotan ang iyang anak ug gani gipangga niini og maayo ang suspek inay silang pamilya.
Si Eleuteria mibiyahe dinhi sa Sugbo gikan pa sa Oroquita City, Misamis Occidental human nadawat ang balita nga gipatay ang iyang anak. Desidido siya nga mopasaka og kaso batok sa suspek nga nagtingkagol karon sa prisohan sa Basak Police Station.
Samtang di motuo si Eleuteria sa katahap ni Flint nga may relasyon ang iyang anak ug sa igsuon ni Flint nga si Jason. Si Jason gisunod sa pagpatay ni Flint nianang adlawa.
Miduaw usab sa haya ni Ashela ang mga kanhi niya kauban sa gitrabahoang call center company ug gihulagway kini sa ilang team leader nga si Arvin Amaga nga usa ka buotang kauban sa trabaho, wa usab sila magdahom nga mahimo kadto ni Flint tungod kay wala may bati nga estorya nga ilang nadunggan bahin niini gikan kang Ashela.
Dad-on sa Oroquita City ang patay'ng lawas sa biktima aron didto kini ihaya ug ilubong. (/EIM)(BANAT NEWS)
- Latest
