Water subsidy program sa Toledo gipatuman
CEBU, Philippines - Gisugdan na sa pagpangapod-apod ang gisaad ni Toledo City Mayor John Henry Osmeña nga water subsidy sa mga konsumedor sa dakbayan.
Unom ka mga barangay ang nakadawat na sa maong libreng patubig nga gilangkuban sa Poblacion, Luray 2, Sangi, Ilihan, Daanglungsod ug Dumlog.
Makadawat og tag P156 nga ipaagi sa kupon ang mga benepisyaryo sa water subsidy.
Ang maong kantidad maoy minimum nga bayranan ug ang sobra bayran na sa konsumedor sa Toledo City Water District.
Sila si Osmeña, TCWD general manager Raul Abellana, city treasurer Ofelia Oliva ug mga konsehal nga sakop sa administrasyon ang nitambong pagpangapod-apod sa kupon.
Ang tanang 38 ka barangay sa dakbayan sa Toledo ang makadawat sa maong water subsidy coupon. Si Osmeña nigahin og P20 milyones nga pundo alang sa maong programa.
Gibanabanang dili moubos sa 12 mil ka rehistradong konsumedor ang makabenepisyo sa programa. (BANAT NEWS)
- Latest
