Polis, BIN sa Balamban gikiha
CEBU, Philippines - Gipasakaan og kaso kagahapon sa National Bureau of Investigation ang intelligence chief officer sa Balamban Police Station kinsa giingong may kalambigitan sa pagrakrak sa mga batan-ong lalaki nga nag-istambay sulod sa usa ka payag.
Kasong multiple murder ug multiple frustrated murder ang gipasaka sa NBI-7 batok ni PO3 Jose Baldicasa, Jr. ug Dennis Mancia, sakop sa Barangay Intelligence Network.
Ang mga nangamatay mao sila si Rey Cleazar Toong, 22, ug Ernel Bucag, 21, kinsa naigo sa KG-9 submachine gun samtang samdan sila si Rhembran Estan, 19, Clint Estan ug Maynard Leonor atol sa insidente.
Si Baldicasa nagtoo nga ang kasong kriminal nga gipasaka batok kaniya adunay kalambigitan sa iyang trabaho isip usa ka pulis nga seryoso sa pagpakigbatok sa ilegal nga kalihukan.
Iyang giangkon nga sagad sa nalambigit sa ilegal nga drugas ug ilegal nga sugal adunay kalagot kaniya.
Matud ni Baldicasa nga off-duty siya atol sa pagpamusil sa Barangay Nangka niadtong Pebrero 7.
Iyang gipadayag nga andam gihapon niyang atubangon ang kaso. (BANAT NEWS)
- Latest
