DOH mag-inspeksyon sa mga tunghaan
CEBU, Philippines - Ang Department of Health nipahigayon usab og inspeksyon sa mga tulunghaan sa siyudad ug sa lalawigan sa Sugbo niining semanaha aron pagsiguro nga luwas lang nga mga pagkaon ang mapalit sa mga bata sa sulod ug sa gawas nga bahin sa ilang mga tunghaan. Ang buhatan ni DOH-7 regional director Jaime Bernadas mibutyag nga mopadala sila og mga sanitary inspectors sa mga tulunghaan.
Una niini, ang Department of Education mipasidaan pinaagi sa ilang nutritionists nga kinahanglang kadto rang mga sustansiyadong mga pagkaon maoy ibaligya sa mga kantina ug kan-anan sa mga eskuylahan.
Katuyuan sa pagbisita sa naasoy nga mga sanitary inspectors mao ang pagsusi kun limpyo o hugaw ba ang mga canteen sa eskwelahan ug ang mga baligya niini ngadto sa mga kabataan.
Usa sa hugot nga nipatuman sa naasoy nga pakisusi mao ang mga sanitary inspectors sa City Health sa siyudad sa Sugbo.
Ang DOH-7 pinaagi sa rekomendasyon sa mga sanitary inspectors, makahimo sa pagpatak-op sa tindahan sa sulod sa tulunghaan kun maghatag kini og hulga sa panglawas sa mga bata. (BANAT NEWS)
- Latest
