Mga bise mayor sa North Cotabato mibisita sa Mandaue City

CEBU, Philippines - Ang liga sa mga bise mayor sa North Cotabato nga gilangkoban sa 13 ka mga lungsod nga gipangulohan sa ilang  presidente nga si Bise Mayor Rodulfo Gancuango sa Kidapawan City mibisita sa dakbayan sa Mandaue.

Si Bise Mayor Gancuangco miingon nga ang ilang tumong sa pagbisita sa Mandaue aron makat-on sa mga pamaagi nga nakahimong malambuon ang dakbayan.

Dugang pa niya nga usa ka highly urbanized nga dakbayan ang Mandaue ug daghang programa nga gipatuman nga buot usab nilang masundog sa ilang tagsa-tagsa ka mga lugar. Gidayeg usab sa mga bise mayor sa kalungsoran sa North Cotabato ang modernong traffic light ug ang pagpahimutang sa Command  Center nga nag-monitor sa kahimtang sa trapiko ug panghitabo sa kadalanan..

Ang  mga bise mayor sa kalungsoran sa North Cotabato miingon nga ang dakbayan sa Mandaue daw walay kalainan sa  kahimtang sa ilang dapit  gawas lang nga usa kini ka highly urbanized city. (BANAT NEWS)