Tulo nakuhaan armas, shabu
CEBU, Philippines - Duha ka lalaki ang nakuhaan og pinaketeng shabu ug armas sa managlahi nga operasyon nga gihimo sa kapolisan sa dakbayan sa Sugbo niadtong Domingo.
Daling girespondehan sa mga sakop sa Guadalupe Police Station ang usa ka armadong tawo nga nasigpatan sa mga residente sa dalan R. Duterte.
Nasikop nilang PO3 Leo Gallego, PO2 Rufino Tablada ug kaubanan ang suspetsado nga si Jernil Nadera, 19, may kapuyo ug nagpuyo sa sitio Kawayan Banawa, Guadalupe. Nakuha sa kapolisan sa posisyon ni Nadera ang .38 paltik revolver ug upat ka gagmay’ng pakete sa gituohang shabu.
Samtang nasikop usab sa mga sakop sa Mabolo Police Station atol sa ilang gihimong checkpoint sa Ayala Access Road, Hipodromo ang duha ka lalaki nga sakay sa motorsiklo nga dunay dala nga replica sa .45 pistol ug upat ka pakete sa gituohang shabu. Ang nasikop mao sila si William Banono, 20, taga Upper Laguerta, Lahug ug Tisario Gallardo, 32, kinsa misulay unta sa paglikay sa checkpoint.
"Niaksyon ni sila og tipas, atong gigukod, wa na nuon ni sila mosukol," matud sa hepe sa Mabolo Police, Senior Insp. Hartzel Peter Bellido.
Nakuha sa posisyon ni Banono ang upat ka pekete sa gituohang shabu ug replica sa .45 caliber pistol ang nakuha gikan ni Gallardo. Ang maong mga dinakpan gipangtanggong na sa detention cell ug gikatakdang pasakaan sa tukmang kaso. (BANAT NEWS)
- Latest
