Amahan nga hubog gipadakop sa anak
CEBU, Philippines - Gipadakop sa kauga-lingong anak ang usa ka amahan nga hubog ug nanghagis dala ang kutsilyo sa ilang panimalay sa Dunggoan, Basak, dak-bayan sa Mandaue niadtong Sabado sa hapon.
Si PO2 Randy Batistis sa Presinto 3 sa Mandaue City Police Office (MCPO) miila sa gidakop nga si Petronelio Quindao, 52, wala’y trabaho. Matud ni Batistis nga gikan nakig-inom sa iyang mga higala si Quindao ug kalit lang nag-wild pag-uli sa panimalay.
Gibadlong unta sa 22 anyos nga anak nga si Clint apan mikuha na hinoon og kutsilyo. Gumikan sa kahadlok ni Clint, dali kining nakadagan paingon sa presinto sa kapolisan ug mihangyo nga dakpon ang hubog niyang amahan.
Matud ni Batistis nga kun dili mopasaka og kaso ang anak, dili gihapon makagawas ang amahan tungod kay ang paghubog-hubog kalapasan man sa ordinansa sa dakbayan ug pabayron sa multa nga P500. (BANAT NEWS)
- Latest
