Libreng kapon sa lalaki sa Talisay
CEBU, Philippines - Libreng kapon sa kalalakin-an o vasectomy ang ipahigayun sa Talisay City District Hospital karong Hunyo 11.
Si Talisay City public information officer Vincie Monterde mibutyag nga ang lalaking magpa-vasectomy mao pa’y bayaran og P1,000 matag usa sa Pro-Quality Life Training and Development Incorporated (Q-Life) kinsa maoy magpasiugda sa kalihukan.
Si Frohnie D. Cagalitan sa Q-Life mibutyag nga moderno nga paagi sa pagkapon nga gitawag og “no scalpel vasectomy†(NSV) ang ilang himoon ug gi-limit lang sa 30 ka Talisaynong lalaki nga interesado.
Gipasabot ni Cagalitan nga sa maong vasectomy dili na kinahanglang tangtangon pa ang itlog sa lalaki ang gamay nga tubo lang nga agianan sa similya ang putlon.
Matud ni Cagalitan nga dili dagom ang ilang gamiton kun dili pressure spray na dili mobati og sakit.
Molanat lang sa 10 ngadto sa 15 minutos ang pagpahigayon sa NSV.
Gawas sa contraceptives ug tubal ligation sa mga babaye, ang vasectomy sa lalaki usa sa paagi sa family planning aron dili na modaghan ang mga anak sa magtiayon.
Matud usab ni Cagalitan nga ang mga doktor nga mopahigayon sa operasyon mipasalig nga dili makapawagtang sa gana sa pakighilawas ang NSV. (BANAT NEWS)
- Latest
