Nisunog sa balay nadakpan

CEBU, Philippines - Hapit maugdaw ang panimalay nga ginama sa kahoy nga giduslitan sa kanhi nagpuyo nga lalaki sa Sektor 2, Pagsabungan, dakbayan sa Mandaue kagahapon sa udto.

Apan suwerte nga nadali sa pagpawong sa nagtinabangay nga mga silingan ug ang suspetsado ilang nadakpan.

Ang nadakpan mao si Roldan Dacotan, lumad nga taga Mindanao, kanhi nag-abang sa gisunog nga balay ni Eduardo Young nga gibanabanang P6,000 ang gibiling danyos.

Matud pa ni SFO3 Roy Garcia, imbestigador sa Bureau of Fire Protection (BFP) sa Mandaue, nga nangita si Dacotan sa iyang kapuyo sa maong balay diin niya biyai ug ang ilang anak duha na ka tuig ang nakalabay.

Apan paghiabot ni Dacotan wala na sa maong balay ang iyang kapuyo hinungdan nga miulbo ang kasuko.

Sa pagbiya sa suspetsado, namatikdan sa mga silingan ang kalit nga pag-ulbo sa kayo sa bongbong ug kisame maoy hinungdan sa ilang pagtinabangay pagbobo og tubig. Dali nakapangayo og tabang sa kapolisan ang mga molupyo hinungdan nga nadakpan ang suspetsado.

Kasong arson ang giandam nga kaso batok sa dinakpan. (BANAT NEWS)