San Fernando- Pinamungajan road
CEBU, Philippines - Karsada nga nagdugtong sa lungsod sa Pinamungajan ug San Fernando gipaabot nga mahuman na pipila ka buwan gikan karon ug makapasamot kini sa paglambo sa kahimtang sa mga molupyo sa mao nga dapit.
Kini nga karsada nga adunay gitas-on nga 14 kilometros mao ang Sangi-Bugho provincial road nga nagdugtong sa duha ka lungsod lagbas sa kabukiran.
Padayon pa kini nga gipatrabaho sa lokal nga kagamhanan sa Pinamungajan ug San Fernando nga gitabangan usab sa probinsya sa Sugbo.
Adunay mga magpapatigayon lungsod sa San Fernando nga bag-ohay lang midonar og 42 mil ka sako sa semento aron sa pagpadali sa paghuman sa maong alternatibong dalan.
Nasayran nga kini maoy ikaduha nga hugna sa road upgrading project sa maong lugar.
Una niini, ang Memorandum of Agreement (MOA) gipahigayon tali sa kagamhanan sa probinsiya sa Sugbo pinaagi ni Cebu Governor Hilario Davide III ug sa mga opisyal sa duha ka lungsod.
Tungod sa mao nga road project malauman na unya ang mas accessible nga dalan ug pagbiyahe sa mga motorista paingon sa lungsod sa San Fernando ug Pinamungajan.
Mas dali nalang usab unya kini alang sa mga motorista nga gikan sa dakbayan sa Toledo ug sa lungsod sa Aloguinsan nga mosubay sa maong dalan. (BANAT NEWS)
- Latest
