Nurse sa maternity house ikiha na
CEBU, Philippines - Karong sunod semana ipasaka na sa magtiayong Noval ang ilang kaso batok sa mga nurse ug sa tagdumala sa Cebu Puericulture Center and Maternity House tungod sa pagplaster sa baba sa ilang anak nga gihimugso sa naasoy nga anakanan.
Si Ryan Noval mitug-an sa mga sakop sa media nga ang ipasaka batok sa nurse ug sa tagdumala sa maternity house mao ang kaso’ng pag-abuso sa bata.
Sa miagi’ng semana na unta ipasaka ang kaso apan naapike sila kay gikinahanglan pa nga kuhaan og affidavit ang dugang mga testigos nga makapalig-on sa kaso.
Ang mga imbestigador sa Commission on Human Rights (CHR-7) nakakuha na og affidavits sa pipila ka witnesses nga mopalig-on sa ilang kaso nga isang-at sa piskaliya.
Matud ni Noval nga kun dili madala ugma’ng adlawa ang pagpasaka og kaso, inigka-Martes sigurado na nga masang-at ang kaso batok sa mga responsable sa hitabo.
Nahukman sa magtiayo’ng Noval ang pagpasaka og kaso batok sa nurse ug sa tagdumala sa maternity house isip pag-abag sa CHR-7 kay ang mga sakop sa Inter-Agency Fact Finding Investigation nga gipangulohan sa Department of Health (DOH-7) miundang na man sa pag-imbestigar. (BANAT NEWS)
- Latest
