Head guard gipatay
CEBU, Philippines - Patay ang head security guard sa usa ka motorcycle distributor human gipusil patay sa duha ka mga wala hiilhing mamumuno niadtong Biyernes sa gabii diha sa Sitio Paradise, Barangay Cogon lungsod sa Compostela.
Nakaangkon og daghang samad pinusilan sa kalawasan si Rey Capuyan Bacod, 41, head security guard sa Norkis Yamaha Corporation. Ang kapulisan misuway pagdala sa biktima sa Danao Provincial Hospital apan nakabsan gyud kini sa kinabuhi. Gitutukan karon sa kapulisan ang motibo nga work related o personal grudge ang hinugdan sa pagpamanhig.
Si PO2 Emil Rubelia, desk officer, mibutyag nga naglakaw na pauli sa ilaha ang biktima gikan nag-duty pasado alas 7:00 sa gabii sa dihang miabot ang duha ka mga lalaking sakay sa motor dayong pusil kaniya sa makadaghang higayon.
Gibana-bana nga anaa pa sa 50 metros nga gilay-on ang biktima gikan sa kompanya diin siya nagtrabaho dihang kini gibanhigan. Naigo si Bacod sa iyang ulo, nawong, ug duha ka samad pinusilan sa buko-buko gikan sa wala pa matino nga kalibre sa armas. Wala’y narekober sa crime scene ang kapulisan.
Sa initial nga follow up investigation sa kapulisan ilang nasuta nga estrikto si Bacod kung kabahin na gani sa trabaho ilabi na sa mga patakaran sa pagbantay sa kompanya.
“Kung bahin na gani og trabaho istrikto gyud ni siya mao na among gitan-aw kung naa ni siya’y nakalalis previously,†matud ni Rubelia kinsa midugang nga daghan nang napapahawa ug napapriso si Bacod kinsa 17 ka tuig nang nag-alagad sa kompanya.
May tawo na nga gitan-aw karon ang kapulisan nga posibleng may kalambigitan pagpatay sa biktima apan nagdumili una sila sa pagbutyag niini pending ang imbestigasyon sa kaso. (BANAT NEWS)
- Latest
