Kuryente sa Toledo City hall nabalik na

CEBU, Philippines - Nabalik na kagahapon sa buntag ang linya sa kuryente sa Toledo City Hall ug uban pang buhatan sa lokal nga kagamhanan sa siyudad human mipagawas ang city treasurer og pundo alang niini.

Gimandoan ni Toledo City Mayor John Henry Osmeña si city treasurer Ofelia Oliva sa pagpagawas sa pundo sa siyudad sa pagbayad sa kapin sa P1.2 milyones nga bayranan sa kuryente.

Nakapagawas og pundo si Osmeña gikan sa naaprubahang P619 milyones nga 2014 annual budget human mi-isyu og 60-day temporary restraining order (TRO) ang Court of Appeals kalabot sa injunction nga desisyon sa Regional Trial Court (RTC) sa sala ni Judge Hermes Montero nga nagpugong sa paggamit sa maong pundo.

Gumikan niini giklaro ni Atty. Glenn Cavada, Toledo City Legal officer nga tungod sa maong TRO sa Court of Appeals makagamit ug makapagawas na og pundo gikan sa 2014 annual budget ang siyudad.

Gawas sa pagbayad sa bill sa kuryente makadawat na usab sa ilang sweldo ang dili momenos sa 570 ka mga empleyado sa Toledo City hall.

Ang maong pundo gikwestiyon gumikan kay giingong wa makaabot og quorum ang mga sakop sa konseho atol sa pagpasar niini hinungdan nga miabot kini sa korte.(/EIM)(BANAT NEWS)