Sa prisohan mag-birthday
CEBU, Philippines - Sa sulod na sa prisohan magsaulog sa iyang ika-20 nga adlaw nga natawhan ang usa ka gipasanginlang level 2 drug pusher ug drug runner human kini nadakpan sa mga sakop sa City Intelligence Branch sa Cebu City Police Office kagahapon sa buntag diha sa Sitio Bato, Barangay Ermita ning dakbayan sa Sugbo.
Si Kelly Pulvera Gerebese nakuhaan og 105 ka pakete sa drugas, nga nagkantidad og 21 mil kapin ka pesos dihang gironda sa grupo ni Superintendent Romeo Santander.
Sumala pa ni Santander nga kini nga operasyon maoy ilang tubag sa pagsaway sa ilang performance kontra illegal drugs.
Sa pakighinabi sa Banat News kang Gerebese, mitulo ang luha niini ug miangkon sa iyang salaod. Matud niya wala na man siya laing kapaingnan aron matabangan ang iyang ginikanan sa kalisod gumikan kay wala siyay kasudlang trabaho.
“Wala g’yud ko misulod anang snatching ug tulis sir, kay mahadlok ko ana, misulay lang ko og baligya ani kay tagaan man ko og 300 pesos kung mahalin ni tanan,†matud pa ni Gerebese.
Nagmahay karon ang suspek tungod kay adlaw niya karong adlawa ug sa prisohan niya kini sugaton.
Gawas sa 105 ka pakete sa drugas nakuha sab gikan sa dinakpan ang P900 nga gituohang halin sa illegal drugs ug ang P200 nga marked money.
Samtang sa dakbayan sa Toledo, nasikop usab sa Provincial Anti-Illegal Drugs Special Operations Task Group (PAIDSOTG) ug sa Provincial Intelligence Branch (PIB) ang giila nga level 3 drug pusher.
Ang nadakpan mao si Niño Villanueva, 36, taga Luray 1, Poblacion Toledo City ug apil sa nasikop ang iyang kauban nga si Luary Jones Manabat, 26, taga Daan Lungsod, Toledo City.
Pasado alas-6 sa hapon Mayo 29, usa ka buy-bust operation ang gihimo sa PIB human ilang nadawat ang impormasyon may kalabotan sa pagpamaligya sa suspetsado og drugas sa maong lugar.
Si Villanueva ug Manabat nasikop sa grupo ni Police Inspector Leo Logronio human sa gihimo nga test buy nga gisundan dayon og buy-bust operation.
Nakuha gikan sa posisyon sa duruha ang 20 ka gagmay nga pakete sa shabu, duha ka medium size, usa ka dakong pakete sa shabu, lima ka bala sa .22 magnum ug usa ka libo ka pesos. Ang tulo ka mga dinakpan sa maong duha ka operasyon pasakaan og kaso kalapasan sa RA 9165 o Comprehensive Dangerous Drugs Act of 2002. (/EIM)(BANAT NEWS)
- Latest
