Post office sa Parkmall abli na
CEBU, Philippines - Gibuksan na ang post office sulod sa Parkmall, reclamation area, dakbayan sa Mandaue.
Ang post master nga si Nathaniel Guingguing miingon nga ang ilang buhatan bukas alas 10 sa buntag hangtud sa alas 7 sa gabii sa adlaw’ng Lunes hangtud Domingo.
Tuyo niini nga mapalambo ang serbisyo sa Philippine Postal Corporation ug dili mauwahi sa serbisyo sa pribadong kompetensiya.
Matud ni Guingguing nga makahatag usab kini og kasayun sa ilang mga kustomer sa pagsusi sa ilang ipadala nga mga sulat pinaagi sa internet ug gihimo usab nila ang labing paspas nga pagpadangat sa ipadala nga mga sulat.
Giangkon niya mas nakabintaha sila sa pribadong kompaniya nga naghatag sa samang serbisyo sanglit daan na silang nakasulod sa mga hilit nga lugar sa tibuok nasud hangtod na sa kabukiran.
Si Guingguing miingon nga ilang gipahimutang ang ilang mga sangang buhatan sa Philpost office sa dagkung mga malls sa Sugbo human nasuta sa ilang pagtoon nga sagad sa mga tawo moadto sa maong lugar ug mahimong ihapit sa pagpadala ang suwat o kuwarta. (/GMR)(BANAT NEWS)
- Latest
