Motorsiklo misaliring, drayber patay

CEBU, Philippines - Patay ang 38 anyos nga lalaki human misaliring ang gimanehong motorsiklo sa national highway sa Ilag, Cantabaco, dakbayan sa Toledo sa miaging gabii.

 Ang biktima nailhan nga si Nestor Roldan, 38, taga barangay Uling, dakbayan sa Naga.

Samdan usab ang 16 anyos nga si Niño Ursabia nga taga Cantabaco human maigo sa motorsiklo ni Roldan.

Si Roldan paingon unta sa Barangay Don Andres Soriano, dakbayan sa Toledo sa dihang kalit lang nilabang sa dalan si Ursabia nga wala mamatikdi ang kusog nga nagdagan nga motorsiklo nga miresulta sa pagkaigo niini.

Maayong pagkalagpot sa duha ug pulos nakaangkon og mga samad hinungdan sa kamatayun ni Roldan ug pagkaangol ni Ursabia. (BANAT NEWS)