Tulo gipusil patay sa managlahing lugar
CEBU, Philippines - Napalgang patay ang usa ka 26 anyos nga drayber sa habal-habal ubos sa Manduyong Bridge, lungsod sa Badian niadtong Miyerkules sa gabii.
Ang biktima nailhan nga si Rainer Gabales, taga Tomonoy, Moalboal.
Giingong gisundan ang biktima gikan sa Moalboal sa mamumuno dayun gibirahan paghiabot sa lugar. Sa Consolacion, patay ang usa ka 20 anyos nga giingong nalambigit sa ilegal nga drugas human gipusil patay sa Sitio Calambre, Pulpogan.
Si Charlito Lacio Jr., nakig–estorya sa iyang higala sa dihang nahiabot ang mamumuno sakay sa motorsiklo dayun pusil makadaghang higayun ngadto sa biktima. Ang kapolisan mitumbok sa ilegal nga drugas sa motibo sa pagpamusil.
Si Sr. Insp. Franco Rodolf Oriol, hepe sa Consolacion Police Station, mibutyag nga nakadispalko og kwarta ang biktima kay wala kini makaremit sa iyang gikuha nga ilegal nga drugas.
Samtang wala makahuman og tagay ang 42 anyos nga si Carlito del Rosario human gipusil patay sa dumpsite, White Road Inayawan, dakbayan sa Sugbo. Giingong kuyog sa iyang mga silingan ang biktima sa usa ka tindahan nga nagtagay sugod pa sa gabii.
Matud pa nga milakaw ang biktima kay mangita og mainom kalit lang kining gipusil sa wala mailhi nga mamumuno. Naglisud ang kapulisan sa pag-ila sa nagpatay kang del Rosario sanglit wala’y nakasaksi sa hitabo ug buto lang sa armas ang nadungog sa mga residente sa lugar. (BANAT NEWS)
- Latest
