German nga naligo sa dagat gikawatan
CEBU, Philippines - Usa ka German national ang nabiktima sa kawatan samtang kini naligo sa dagat ug gibilin sa cottage daplin sa baybayon ang iyang mga gamit diha sa Lungsod sa Badian.
Ang biktima naila nga si Martin Siegmund, 54, kinsa nagbakasyon sa maong lugar kauban ang misis niini.
Matud pa ni PO1 Carlito Zulueta sa Badian Police Station nga nahinabi sa Banat News nga nakuha sa mga kawatan ang usa ka camera sa langyaw nga kantidad 300 Euro, usa ka black wallet nga dunay sulod P4,000.00, drivers license ug uban pa nga importante nga ID’s.
Sumala pa sa langyaw ngadto sa kapulisan nangaligo sila og dagat sa Barangay Lambo, Badian ug kumpiyansa siyang gibilin ang iyang mga gamit sa cottage.
Dunay nakakita nga dunay duha ka mga lalaki nga mihapit og kuha sa mga gamit sa langyaw ug dali ‘sab nga mipalayo sa lugar. (BANAT NEWS)
- Latest
