NTC nipahimangno batok text scam

CEBU, Philippines - Giawhag sa National Telecommunications Commission-7 ang publiko sa pagdangop sa ilang buhatan kung makadawat og kadudahang mga text messages sa cellphones.

Kini nunot sa ka daghan pa gihapon sa nabiktima sa mga text scam sama sa pagpangayo og load ug kwarta ug magpaila nga kabanay sa ilang biktima.

Matud ni NTC-7 Regional Director, Engr. Jesus Laureno, nga mahimong i-block ang numero nga gigamit sa pag-text sa ilad nga mensahe ug dili papason ang text aron masubay sa ilang buhatan.

Giangkon sa NTC-7 nga dili gyud nila masuta ang nagpasiugda sa text scam apan giingong gikan kini sa kauluhan.

Gipadayag sa NTC-7 nga wa’y hunong ang ilang pagpahimangno sa publiko pinaagi sa mga media outfits aron dili mailad.

Nakig-alayon na karon ang mga telecommunication companies sa ahensiya pinaagi sa memorandum of agreement diin tanang reklamo sa NTC ilang iduso ngadto sa mga telcos aron sila na ang mo-block sa numero.

Gikan sa buwan sa Enero hangtud Mayo adunay 12 ka reklamo nga nadangat sa buhatan sa NTC-7.

Ang publiko mahimong motawag sa hotline number sa NTC-7 nga 346-0179 ug 422-6822 alang sa ilang reklamo ug mahimong makakuha og complaint form pinaagi sa ilang website nga ntc.net.ph. (BANAT NEWS)