Voters registration sa Toledo gihunong

CEBU, Philippines - Gumikan kay wa makabayad sa bill sa kuryente ang Toledo City Hall, hasta operasyon sa Commission on Elections (Comelec) sa maong siyudad nabalda usab.

Gihunong una sa Toledo City Comelec ang pagpahigayon og voters registration ug pagkuha og mga biometric data sa mga botante kay naapil ang ilang buhatan sa naputlan og kuryente kay wa makabayad ang siyudad sa Cebu Electric Company III.

Matud ni Toledo City election officer Atty. Michael Angelo Sarno , di mosiga ilang mga computers kun way kuryente.

Nasayran nga nagtinguha ang Comelec Toledo nga makaparehistro sa dili momenos 19 mil ka mga botante sa siyudad. Apan hangtod karon wala pa makaabot sa katunga ang nakaparehistro hangtod nga naabtan nga naputlan sa kuryente.  Hinuon nagkanayon si Sarno nga mopahigayon sila og registration sa kabarangayan aron  makaparehistro ang mga tawo.

Ang Toledo City dunay balayrunon nga P1.2 milyones sa kuryente . Usa sa gibasol niini mao ang pagkatanggong sa P619 milyones nga 2014 budget gumikan sa pagkwestyon sa mayoriya sa Konseho kun nganong napasar kini nga wa may quorum. Ang isyu anaa na karon sa korte. (BANAT NEWS)