Awto nibangga sa fire hydrant, usa angol

CEBU, Philippines - Grabeng naangol ang usa ka batan-ong lalaki nga nadasmagan sa sakyanan nga gimaneho sa babayeng call center agent samtang nag-atang og masakyan sa dalan A.S. Fortuna, Bakilid, dakbayan sa Mandaue sayo kagahapon sa buntag.

Ang biktima mao si Reymark Anthony Barril Fabrique, 23, ulitawo, taga Purok Sampaguita, Banilad sa maong dakbayan samtang ang nakadasmag mao ang Nissan Sentra nga gimaneho ni Lyra Navarette Nakagawa, 21 anyos, dalaga nga taga San Isidro, dakbayan sa Talisay.

Si SPO4 Apolinario Niez, imbestigador sa traffic division sa Mandaue City Police Office (MCPO), nga nahinabi sa Banat News miingon nga kusog ang dagan sa sakyanan ni Nakagawa ug kalit lang nga nabangga sa fire hydrant nga nahimutang daplin sa dalan sa maong lugar. Nawad-an og kontrol ang nagmaneho hinungdan nga nilahos kini sa gibarugan sa biktima.

Gidala ang biktima sa Gullas Hospital samtang gidakop sa kapolisan ang drayber nga nakadasmag. (BANAT NEWS)