Power shortage sa Sugbo dili grabe
CEBU, Philippines - Natagbaw si Gob. Hilario Davide III sa report sa power sector kabahin sa kahimtang sa supply sa kuryente sa Sugbo atol sa ilang tigum kagahapon.
Kini bisan giingon sa National Grid Corporation of the Philippines (NGCP) nga kuwang ang supply sa kuryente sa tibuok Visayas.
Dili hinoon grabe ang problema sa Sugbo gumikan sa supply gikan sa Luzon.
"I was satisfied of what transpired sa meeting with power sector," matud ni Davide.
Gipadayag sa gobernador nga dili magdugay ang power shortage kay mobalik na sa operasyon karong adlawa ang napawong nga planta sa Cebu Energy Development Corporation (CEDC) sa dakbayan sa Toledo ug Panay Energy Development Corporation sa Panay sumala sa Visayan Electric Company (VECO).
Aron malikayan ang grabeng problema sa power shortage, giawhag ni Davide ang mga mayor nga ipa-enrol ang ilang lungsod ug siyudad sa programa sa Energy Regulatory Commission.
Ang programa gitawag og Interruptible Load Program kung diin ang mga dagkung kunsumedor mogamit sa ilang mga generator aron mogamay ang demand sa kuryente. (/GMR)(BANAT NEWS)
- Latest
