Asawa sa ‘drayber’ sa mipatay sa babayeng negosyante mihimakak

CEBU, Philippines - Kusganong gihimakak sa asawa sa gipasanginlang drayber sa gunman nga mipatay sa usa ka babayeng negosyante  ug miangol pa sa laing duha ka tawo sa  eskina M.C. Briones ug A.C. Cortes Avenue, sa Maguikay flyover alas 6 pasado sa Biyernes sa gabii sa miaging semana ang mga pasangil batok sa iyang bana.

Si Renalyn Llanto nga nahinabi sa Banat News nagkanayon nga imposible ang pasangil batok sa iyang bana kay dili man kini makamaong momaneho og motorsiklo kay sakyanan ra ang iyang naantigohang drayban.

Ang iyang bana nga si David Bolabola Llanto, maoy gidakop sa kapolisan ug giingong gitumbok sa mga saksi nga maoy drayber sa motorsiklo gisakyan sa gunman nga mipatay kang Imelda Tio Yu.

Matud pa sa ginang nga nianang adlawa wa gyud molakaw iyang bana sa ilang balay, gidasonan usab kini sa igsuon sa suspek nga si Diana kinsa miingon di makamaong mag-motor iyang igsuon ug wala kini molakaw.

Gawas kang Tiu, nga tag-iya ug nagdumala sa usa ka furniture ug textile company sa Barangay Subangdaku , naangol usab ang drayber sa traysikol nga si Roger Calumba ug laing pasahero nga si Arnel Sedillo Juanite.

Si Senior Inspector Jimmy Portes nga maoy hepe sa Investigation Detection and Management Bureau (IDMB) sa Mandaue City Police Office (MCPO) miingon nga positibo g’yud nga giila sa tulo nila ka mga saksi si Llanto kay nakamay-on sila niini kay magkanunayan kini sa crime scene sa wa pa ang pagpatay. (/EIM)(BANAT NEWS)